منتديات بحر الامل - عرض مشاركة واحدة

#1 2021-10-18, 08:14 PM

عظّم الله أجر حبي والبقيه في حياتي
............... لازم أرضى في نصيبي وأربط جروح ٍ عطايب
انتهى عصر المحبه ولا تعود الذكرياتي
...............والعجيب أعيش بعده تايب ٍ وأموت تايب
يا الحبيبه وين رحتي وين قلبك ليه ماتي
............... ما تركتي ضو شمعه يوم نور الشمس غايب
ما بقى لي من رحلتي صادق ٍ يجمع شتاتي
...............ولا بقى لي غير جرح ٍ وسط قلب ٍ فيك ذايب
ما بنيتي لي سعاده ولا وصلتي أمنياتي
...............ولا صبرتي عام واحد تستوي فيه العجايب
كل يوم ٍ بعد فقدك ما أعدّه من حياتي
...............انتهت والعمر ولّى طايب ٍ أو غير طايب
والنتيجه استوت عندي حياتي والمماتي
...............انكسر وجه المرايا يوم صار الحظ عايب
كنت غصن ٍ فوق عالي ما يطولنه البناتي
...............كنت طير ٍ لا تعلّى يقهر جموع السحايب
كنت درب ٍ في حياتك مزهر ٍ فيه النباتي
...............كنت أبا أرضي فيك نفس ٍ هدّها ظلم القرايب
كنت أغلى شي عندك تذكريني يا غناتي
...............)تذكريني يوم قلبك من طريق العشق هايب(
يوم كنتي تحتريني كل ما أطلع للصلاتي
............... ألمحك وأقول ربي لا تفرق هالحبايب
داخل ٍ في ظل عدله عن شرور الكايناتي
............... كم دعيته في سجودي ولا جبرني بالطلايب
والهموم اللي دعتني من ورا غلطة سكاتي
...............كيف أفهمها حبيبه صارت لغيري وهايب
الخجل حطّم كياني ليت ما هاذي سواتي
...............الله اللي راد هذا ليه أعدد بالسبايب
اقنعي يا بنت حوا والندامه ما تواتي
............... كل حزن ٍ صاب قلبك صاب قلبي منه صايب
انكتب باللوح نبقى طول هالدنيا شتاتي
...............لا ولا باليد حيله عند نزلات المصايب
والوفا والعشق الأول واللقا والذكرياتي
...............سافرت من غير رجعه واسكنت تحت الترايب

الموضوع الأصلي: انكسر وجه المرايا يوم صار الحظ عايب |~| الكاتب: الهاوي |~| المصدر: منتديات بحر الامل

بحر الامل

العاب ، برامج ، سيارات ، هاكات ، استايلات , مسابقات ، فعاليات ، قصص ، مدونات ، نكت , مدونات , تصميم , شيلات , شعر , قصص , حكايات , صور , خواطر , سياحه , لغات , طبيعة , مفاتيح , ستايلات , صيانه , تهيئة , قواعد , سيرفرات , استضافه , مناضر, جوالات