منتديات بحر الامل - يانفس هدي لاتزيدين الاوجاع

يا.. نفس هدي لاتزيديـن الأوجـاع
كافي من الدنيا نشـوف العجايـب..

ماني على من صد ضايق ومرتـاع
لاهو مـن الغاليـن والا القرايـب..

لاصـار مابينـي ولا بينـه نـزاع
ولاجيتـه بزلـه ولاعلـم خايـب..

حق الرفيق انـي نهيتـه ولا طـاع
والراي مابه فرض والا غصايـب..

يومه غدا بينت لـه كـل الأوضـاع
ماقلت اخلي سايب الوضع سايـب..

ناديت لـه لكـن تجاهلنـي وضـاع
صد وعلى عمياه سـاق الركايـب..

اقفا علـى رايـه ولافيـه مرجـاع
مثل السحاب اللـي قفتـه الهبايـب..

للعلم بين النـاس مدخـل ومطـلاع
واللي يجود حامض العلـم صايـب..

ومن ينطح المويه ولاعنـده شـراع
ان عاش يرجع من هك الموج هايب..

والعاقل اللي لا خطا يرجـع بسـاع
يسترجع ولاياخـذ الـراي عايـب..

واللي يصير لرغبة النفـس مطـواع
لابـد مايلقـى العنـا والمصايـب..

والناس مختلفه لها اشكـال واطبـاع
بعض المعارف عرفهم لك نشايـب..

بالناس من يلبس علـى وجـه قنـاع
حسود لكـن فـي ثيـاب الحبايـب..

هذاك مانـي فـي مخـاواه طمـاع
من قبل اجيه وخاطري منه طايـب..

ولا الرجال اللي لهـم بالوفـا بـاع
وقفاتهم تبري الجـروح العطايـب...

واللي لفـاك بحـزة الضيـق فـزاع
مادار وجهه عن سمـوم ولهايـب..

ماصد يوم انك مـن الوقـت ملتـاع
ماغاب يوم ان اكثر الناس غايـب..

هذاك تشـري خوتـه كيـف تنبـاع
هذاك من شانه تهـون الصعايـب..

قلتهـوانا مالي ورى هرجي اطمـاع
على افراقـه لاتصيـر السبايـب..

اسمع مادام الصوت ياصل للاسمـاع
ان تبت والا ياعسى منـت تايـب..

مادامها صـارت حـزازات واتبـاع
مالي ومـال مدوريـن الطلايـب..

واعرف تراها لو شكت ثقلك القـاع
مصيرها تركـز عليـك النصايـب ..